Кыргызстанда "Баарына ден соолук!" деп аталган акция башталат
Саламаттык сактоо министрлиги билдиргендей, 6-7-апрелдеги республикалык масштабдагы акция Дүйнөлүк ден соолук күнүн утурлай өткөрүлгөнү жатат. "Баарына ден соолук!" деген ураандын алдындагы иш-чараны аталган мекеме Beeline компаниясы жана "Саламат клуб" волонтерлор кыймылы менен чогуу уюштурууда.
Маалыматка караганда, эки күн бою өлкө аймагында саламаттыкка кам көрүү боюнча маалымдоо, алдын алуу иш-чаралары өткөрүлөт. Студент-волонтерлор калкка гипертония, жүрөк-кан тамыр дарттарын, диабеттин алдын алуу боюнча маалыматтарды таратат. Ошондой эле флешбом, сынак, суроо-жооп оюндары жана спорттук мелдештер белгиленген.
Дүйнөлүк Саламаттык сактоо уюму быйылкы Ден соолук күнүн "Кайсы жерде болбосун баарына тегиз медициналык тейлөө" деген теманын алдында өткөрмөкчү.
Дүйнөлүк Саламаттык күнү жыл сайын 7-апрелде белгиленет. Жылына дүйнө боюнча тынчсыздануу жараткан ар кандай оорулардын алдын алуу, дарылоого көңүл бурулат. 2017-жылы депрессия, 2016-жылы диабет негизги тема болгон. (NT)