Соттук-укуктук реформа жүргүзүү боюнча улуттук кеңеш түзүлдү
Улуттук кеңешке коомдук ишмерлер, саясатчылар жана активисттер кирет, мүчөлөрүнүн саны 21 адам. Соттук-укуктук реформа жүргүзүү боюнча улуттук кеңеш түзүү боюнча демилге 10-апрелде Кыргызстандагы сот системасынын абалын талкуулоо учурунда көтөрүлүп, аягында резолюция менен бекитилди.
Талкууда өлкөдөгү сот системасы туңгуч президент Аскар Акаевдин тушунан бери эле көз каранды болуп келгени айтылып, бийликке каяша кылып, сынга алган саясатчылар, журналисттер камалып кеткени сөз болду. Талкуунун айрым катышуучулары улам бийлик алмашкан сайын соттук реформа жүргүзүү тууралуу маселе көтөрүлүп, ал кагаз жүзүндө гана калып жатканын айтышты. Алар бул кээ бир судьялардын бийликке жагымдуу, бирок адилетсиз чечимдерди чыгара беришине шарт түзүп бергенин эске салып, адилетсиз чечим чыгарган сотторду жоопкерчиликке тартууну талап кылышты.
Кыргызстанда жарандык активисттер сот системасын сындап жүрүшөт. Алар буга акыркы эки жылда саясий себеп менен камалган саясатчылар көбөйгөнүн, сөз эркиндигине, журналисттерге карата мамлекеттик бийликте отурган адамдардын доо арызына ылайык, көп суммадагы айыппулдар салынышын мисал келтиришет.
2010-жылдагы апрель окуясынан кийин келген бийлик сот адилеттигин орнотууга убада берген. Бийлик судьялардын 60-70 пайызы жаңыланганын, алардын айлыгы көбөйүп, материалдык-техникалык шарттары оңолгонун айтып келет. (ZKo)