Ирандагы нааразылык акцияларында өлгөндөр 150дөн ашты
Amnesty International уюму Ирандын коопсуздук күчтөрү нааразылыкка чыккандарды катуу басып жатканын, Систан жана Белуджистан провинциясынын Захедан шаарында эле ондогон адамды өлтүрүп салганын маалымдады. Уюм полиция жалпы 66 адамды өлтүрдү деп эсептеди.
Human Rights Watch укук коргоо уюму 18-20 күндөн берки каршылыктарда жалпы 154 адам, анын ичинде 9 жаш бала мерт болгонун кабарлады.
13-сентябрда Тегеранда адеп-ахлак полициясы көчөдө хижабсыз жүргөнү үчүн деген негизде кармап кеткен 22 жаштагы студент кыз Махса Амини абакта каза болгону 16-сентябрда кабарланган. Полиция ал жүрөгү кармап көз жумганын маалымдаган, бирок күбөлөр полиция аны катуу сабаганын айтып беришкен.
Буга байланыштуу нааразылыктар өлкөнүн 80 шаарларында тутанып, полиция менен кагылышуулар катталды. Демонстранттар курал кампаларын басып алып, өкмөттүк күчтөр менен атышып жатканы кабарланууда. Коопсуздук кызматкерлери да демонстранттарга каршы курал колдонуп жатат.
Акцияларда аялдар жоолуктарын чечип ыргытып, чачтарын кесип жатышат. Демонстранттар арасында өлкө лидери, аятолла Али Хаменеинин атына каршы “Хаменеи кулатылат!” жана “Диктаторго өлүм!” деп ураан чакыргандар да болуп жатат. (ErN)