Откако Британија ја обвини РТ за пристрасност, Русија го истражува Би би си
Рускиот медиумски регулатор Роскомнадзор соопшти дека започнал со проверка на легалноста на работењето на светскиот канал на Би би си во Русија, како и на интернет страницата на Би би си, откако британското тело за медиуми Офком ја обвини руската телевизија РТ за прекршување на правилата на непристрасност.
Роскомнадзор денеска соопшти дека целта на проверките е да се утврди дали содржината на Би би си е во согласност со руските закони.
Офком вчера соопшти дека размислува за изрекување санкции против РТ, образложувајќи дека државната руска телевизија ги прекршила правилата за непристрасност во седум емисии годинава, вклучувајќи го и известувањето за труењето на поранешниот руски шпион Сергеј Скрипал и неговата ќерка во Англија. Според Лондон, зад труењето стојат двајца агенти на руското воено разузнавање, но Кремљ негира.