Турција испрати засилување на границата со Сирија, објавија денеска турските медиуми, два дена откако американскиот претседател Доналд Трамп ненадејно одлучи да ги повлече сите американски војници од Сирија. Државната новинска агенција Анадолија објави дека засилувањата, вклучително и војници, но и камиони кои носат тенкови и хаубици, пристигнале во југоисточната провинција Килис. Весникот Хуриет објави дека распоредувањето на дополнителните сили почнало викендов. Во меѓувреме, во Сирија, опозициските борци поддржани од Турција се распоредија околу градот Манбиџ кој е под контрола на Курдите, објави Анадолија. Манбиџ е под контрола на Курдските сили за заштита кои се поддржани од САД, но Анкара ги смета за терористи поврзани со Курдската работничка партија. Курдските сили освоија голем дел од северниот и источниот дел на Сирија од Исламската држава. Тие изразија шокираност од одлуката на Трамп за повлекување на американските војници и сега се соочуваат со тројна опасност – од сириската влада, од Турција, но и од Исламската држава.