Десетици загинати во пожар на главната железничка станица во Каиро
![Десетици загинати во пожар на главната железничка станица во Каиро](https://gdb.rferl.org/9813D861-7E7F-4363-8C06-1EE65EAD237A_w800_h450.jpg)
Најмалку 20 луѓе загинаа, а повеќе од 40 се повредени во пожар на главната железничка станица во главниот град на Египет, Каиро. Безбедносни извори велат дека пожарот избувнал кога воз удрил во платформа на железничката станица Рамзес во центарот на Каиро. Според непотврдени извори, пожарот бил предизвикан од експлозија на резервоар за гориво.
Шефот на железничката болница во Каиро, Мухамед Саид, изјави дека се очекува бројот на загинати да расте.
Десетици амбулантни и противпожарни возила се на местото на несреќата, а над железничката станица се издигнува црн чад.
Обвинителството нареди истрага за случајот.