Уште петмина починати од грип во Црна Гора, вкупно 15 сезонава

Во Црна Гора починаа уште пет лица од компликации од грип, со што вкупниот број починати за оваа сезона се зголеми на 15, покажуваат најновите податоци на црногорскиот Институт за јавно здравје.

Во извештајот за периодот од 18 до 24 февруари се наведува дека претходната недела починале тројца машки пациенти на возраст од 54, 58 и 73 години. Ниту еден од нив не бил вакциниран со сезонската вакцина против грип, пренесува Радио-телевизија Црна Гора.

Во Центарот за контрола и превенција на заразни болести минатата недела се пријавени двајца починати пациенти, на 48 и 67 годишна возраст, кои починале на 6 и на 16 февруари. Исто така, потврдени се 43 случаи на заболени од грип, а вкупниот број лабораториски потврдени случаи на грип од почетокот на сезоната изнесува 379.