Заев-Теохаропулос: Договорот од Преспа е историски чекор

Премиерот Зоран Заев денеска се сретна со Танасис Теохаропулос, претседател на политичката партија ДИМАР и пратеник во грчкиот Парламент, придружуван од неговите соработници. Од владината прес служба сооптија дека на средбата, премиерот ја истакнал нивната храбра одлука како партија да го поддржат Договорот од Преспа, со што, како што подвлече Премиерот се преземаа конкретни чекори за реализирање на историските достигнувања за двете земји.

“Беше истакнато дека Северна Македонија ја има целосната поддршка за приемот во НАТО и беше понудена соработка за што поскоро исполнување на условите за почеток на преговорите со Европската Унија. На средбата, соговорниците изразија одлучност за унапредување на меѓусебната доверба, разбирање и поддршка во иднина и развивање и зајакнување на веќе поставената економска и трговска соработка меѓу Република Северна Македонија и Република Грција,” се вели во соопштението од владата.

Лидерот на Демократската левица, Теохаропулос, кој во грчкиот Парламент гласаше за ратификација на Договорот од Преспа и беше избришан од Движењето на промена, коалицијата на ПАСОК и Демократска левица, поради различниот став од мнозинството пратеници на Коалицијата, на премиерот Заев му упати честитки за исправната одлука во врска со Договорот од Преспа, која како што истакна е еден вид победа над национализмот.