Ердоган ги „осуди како терористи“ студентите од протестот во Истанбул

Турскиот претседател Реџеп Таип Ердоган денеска ги осуди студентските демонстранти како „терористи“ и вети дека ќе изврши акција против демонстрациите против назначувањето на личност лојална на владата за претседател на најпрестижниот универзитет во Истанбул, јави АП.

Студентите и членовите на факултетот на универзитетот „Богазичи“ поминаа неколку недели протестирајќи против назначувањето од Ердоган на 1 јануари на академик Мелих Булу, кој своевремено се кандидираше за пратеник како кандидат за партијата на Ердоган. Тие повикаа Булу да се повлече од функцијата ректор и да му се дозволи на Универзитетот да избере свој претседател, за да се испочитуваат академските слободи.

Голем број студенти се приведени за време на протестите, некои беа однесени од полицијаа по упади во нивните домови, пренесе АП.

„Не прифаќам овие млади, кои се членови на терористички групи, да ги споделуваат националните и моралните вредности на нашата земја“, рече Ердоган во видео обраќање пред илјадници членови на владејачката партија кои одржуваат регионални конгреси, јави АП.

„Дали сте студенти ... или сте терористи кои се обидуваат да извршат рација во канцеларијата на ректорот и да ја окупираат?“, рече Ердоган.

Тензиите се разгореа оваа недела откако група студенти беа уапсени поради постер, кој беше ставен на универзитетот Богазичи и на кој е претставено најсветото место на исламот со знамиња за ЛГБТ-права. Студентите беа уапсени за време на викендот под обвинение за поттикнување омраза и навреда на верските вредности. Повеќе од 250 демонстранти беа приведени по судирите со полицијата во Истанбул во понеделникот и вторникот, а вчера беа уапсени околу 70 студенти во Анкара кои дадоа поддршка на колегите од Истанбулскиот универзитет.