Градот тврди улиците се чисти, ВМРО-ДПМНЕ дека Скопје е блокирано

Од град Скопје денеска информираат дека се одржал состанок на кризниот штаб на кој потврдиле дека скопјани ќе ја дочекаат работната недела со целосно функционални улици и тротоари.

„Екипите на зимската служба на Град Скопје беа на терен уште од почетокот на вчерашниот ден и во текот на ноќта, при што досега се фрлени над 1000 тони сол на градските булевари и улици. Сите градски улици и булевари во текот на деноноќието беа чисти и проодни и никаде не е забележан застој на сообраќајот. Јавниот превоз се одвива без проблеми и нема одложени градски линии на ЈСП Скопје, а интензивно се расчистуваат снегот и мразот од тротоарите и од јавните површини“, наведуваат од град Скопје.

Од таму додаваат дека одлучиле да и помогнат на општина Сопиште во расчистувањето на неколкуте општински улици кои што се се уште блокирани и нагласуваат дека во нивна надлежност булеварите и поголемите градски улици, а преостанатите се во надлежност на општините и тие се задолжени за нивно чистење и одржување.

Марија Митева од ВМРО-ДПМНЕ, пак, на денешната прес конференција рече дека во сите општини имало заглавени возила по коловозите, непристапни пешачки патеки, а дека механизацијата со која толку се фалеа градоначалниците ја немало никаде.

„Ве прашуваме каде се службите, каде е механизацијата на градот? Градот Скопје е блокиран и непроооден при првиот снег. Градот Скопје троши милиони евра за чистење на снег, кој како што можете да видите воопшто не е исчистен. Снегот можеби ќе ја сокрие нечистотијата на градот, но ќе ја извади на површина неспособноста на Шилегов“, рече Митева.