Пронајдени тела на 13 турски државјани во пештера во Ирак

Турската војска соопшти дека во пештера во северен Ирак пронашле тела на 13 турски државјани кои биле киднапирани од курдските бунтовници. 

Министерот за одбрана Хулуси Акар денеска рече дека телата биле пронајдени за време на операција која почнала на 10 февруари против забранетата Курдска работничка партија.

Идентитетот на турските државјани не се открива, а министерот рече дека нивното киндапирање не било претходно објавено од безбедносни причини. Двајца членови на Курдската работничка партија, кои биле уапсени за време на операцијата, кажале дека турските државјани биле егзекутирани кратко пред почетокот на турската воена операција во регионот.

Акар рече дека 48 курдски милитанти биле убиени за време на операцијата. Тој исто така кажа дека двајца турски војници биле убиени, а тројца повредени за време на операцијата. Засега нема соопштение од Курдската работничка партија која ги користи базите во северен Ирак за да извршува напади врз Турција.