Од властите е потребна поддршка за слободата на медиумите
Од власта и институциите се очекува да покажат сериозна одговорност и посветеност во поддршката на медиумските права и слободи, во насока на креирање поволен амбиент за медиумите во кој што тие ќе дејствуваат без ограничувања и препреки, велат од Советот за етика во медиумите на Македонија (СЕММ), по повод 3 мај – Светскиот ден на слободата на медиумите.
"Секој обид изолирано да се интервенира во медиумските политики и реформи, спротивно на заложбите на професионалната медиумска заедница, ќе го разбереме како обид за контрола и влијание и наметнување рестриктивни услови за работа на медиумите. Искуството потврдува дека најголемиот ризик за демократијата произлегува токму од медиумите што биле и остануваат под контрола на политичките центри на моќ", се наведува во соопштението на СЕММ.
Светски ден на слободата на печатот: притисоци врз независноста
Според Советот, креирањето демократски амбиент за медиумите подразбира адресирање на причините и факторите коишто досега влијаеле врз слободата на медиумите, "бидејќи политички независните медиуми се неизоставен дел од битката за промоција на демократски вредности и стандарди на квалитетно новинарство".
Советот нагласува дека пандемијата ги потврди предизвиците пред кои се исправени медиумите во државата, почнувајќи од недоволната безбедност и заштита на новинарите и медиумските работници, па до ограничувачките услови за работа на редакциите.
Во соопштението се додава дека статистиката на СЕММ го потврдува присуството на случаи на неетичко информирање, при што речиси 40 проценти од пријавените случаи во изминатата година се однесуваат на информирањето за кризата со коронавирусот.
"Загрижувачки е што во 67 отсто од вкупниот број на жалби, станува збор за неточни и непроверени информаци, а во речиси 20 проценти не се прави разлика меѓу фактите и мислењата, вестите и коментарот, се нагласува во соопштението.
Чадиковски – Опстојува спрегата меѓу политиката, бизнисот и медиумите
Здружението на новинари на Македонија пак заедно со Мисијата на ОБСЕ во Скопје, повикуваат на солидарност и поддршка, пред сè од јавноста, за новинарите и медиумските работници кои во изминатата година се соочуваат со големи здравствени, безбедносни, финансиски, но и етички предизвици, во обидот соодветно и навремено да ја информираат јавноста за случувањата поврзани со Ковид-19 пандемијата.
"Одбележувајќи го Светскиот ден за слобода на медиумите – 3 мај, денес во услови на светска здравствена криза, повеќе од кога и да е претходно стана јасно значењето на независното и професионално новинарство. Кризата предизвикана од пандемијата со Ковид-19 ги исфрли на врвот сите доблести, но и слабости на новинарството кое во изминатиот период минува низ сериозни промени и премрежја" анведуваат од ЗНМ.
Според овогодинешниот извештај на „Репортери без граници“ за слобода на медиумите објавен неодамна, Македонија бележи скок од 2 места на оваа листа и сега се наоѓа на 90-то место од вкупно 180 земји во светот.