Вархеји утре во Скопје по повод пристигнувањето на првите вакцини од ЕУ

Еврокомесарот за проширување Оливер Вархеји утре ќе ја посети Северна Македонија по повод пристигнувањето на првите вакцини против Ковид-19, споделени и финансирани од ЕУ.

Заедно со Вархеји, во Скопје ќе допатува и австриската министерка за Европа и Устав, Каролине Едштадлер.

Според најавата, еврокомесарот за проширување утре ќе се сретне  со премиерот Зоран Заев во Владата, по што заедно со Едштадлер и министерот за здравство Венко Филипче, ќе го посетат вакциналниот пункт во А1 СЦ Борис Трајковски.

По посетата на пунктот, како што соопшти Делегацијата на ЕУ во Скопје, ќе следуваат изјави за медиуми од страна на премиерот Заев, министерката Едштадлер и еврокомесарот Вархеји.

Европската комисија и Австрија на 20-ти минатиот месец објавија дека вкупно 651.000 дози на вакцините „Фајзер“ ќе бидат доставени на регионот, на неделна основа, од почетокот на мај до август. Од нив, 119.123 вакцини ќе бидат за Северна Македонија.

Вакцините се финансирани од пакетот вреден 70 милиони евра, кој ЕК го одобри во декември минатата година за да помогне во покривањето на трошоците за вакцини обезбедени преку договорите на ЕУ за авансна набавка за партнерите од Западен Балкан.

Австрија го олесни споделувањето на овие вакцини финансирани од ЕУ преку правни договори со производителот и со секој партнер од Западен Балкан.

"ЕУ покажува солидарност и грижа во однос на земјите од Западен Балкан од самиот почеток на пандемијата. За Северна Македонија, ЕУ обезбеди околу 230 милиони евра за итни медицински набавки и како поддршка во ублажувањето на социо-економските последици од пандемијата", стои во соопштението на Делегацијата на ЕУ во Скопје

EУ: Русија и Кина сејат дезинформации за поткопување на довербата во западните вакцини

Европскиот комесар за проширување Оливер Вархеји вчера беше во Србија, а утре ќе престојува и во Босна и Херцеговина и Црна Гора.

„Патувам на Западен Балкан за да пренесам јасна порака: Ние се грижиме! Ние се грижиме за нашите партнери и се грижиме за нивните здравствени работници и најранливите. Испораките со вакцини ја потврдуваат нашата постојана посветеност на поддршката, како што сторивме уште од избувнувањето. Заедно посилни“, изјави тој пред да ја започне посетата во регионот на Западен Балкан по повод пристигнувањето на првите вакцини против коронавирус испратени и платени од Европската унија.