Трговијата меѓу ЕУ и Велика Британија опадната за една четвртина после Брегзит
Трговската размена меѓу ЕУ и Велика Британија опаднала за скоро една четвртина во првите три месеци по Брегзит, покажуваат податоците на британската Канцеларија за национална статистика.
Најголем пад е забележан во трговијата со Ирска и со Германија, пренесува бриселскиот портал Еурактив.
Членките на ЕУ го одобрија трговскиот договор за Брегзит
Извозот во Ирска опаднал за 47 отсто меѓу декември и јануари, а најголем е падот на извоз на хемикалии, животни и во прехранбениот сектор. Според договорот за Брегзит, воведени се царински проверки на целата стока која во Ирска влегува од Велика Британија.
Увозот од Германија, најголем трговски партнер на Велика Британија меѓу членките на ЕУ, опадна за 30 отсто, односно за 1,7 милијарди фунти во истиот период.
Според договорот меѓу Брисел и Лондон за трговија и соработка, кој стапи на сила на 1 јануари, стоковата размена меѓу двете страни ќе се одвива без царини и по излегувањето на Британија од Унијата.
Меѓутоа, ЕУ воведе гранични проверки на извозот од Велика Британија, додека Лондон одлучи постепени да воведува реципрочни мерки до октомври.
Британската статистичка канцеларија соопшти дека податоците се споредувани со истото тримесечје од 2018 година, затоа што тоа е најновиот период со релативно стабилна трговија.
Исто така се наведува дека било тешко целосно да се раздвојат влијанијата кои пандемијата на коронавирус и излегувањето на ЕУ ги имале врз британската и меѓународната трговија.
Британските министри сметаат дека падот на трговската размена во еден дел се должи на влијанието на пандемијата и на правењето залихи од британските компании во ЕУ во пресрет на крајот на преодниот период.
Во првото тримесечје од годинава вкупната стокова размена со земјите од ЕУ е намалена за 23 отсто, а со државите надвор од Унијата за 0,8 отсто во однос на првиот квартал од 2018 година.
Најголем пад на трговијата е забележан во јануари, кога извозот од Велика Британија во ЕУ е намален за 40 отсто во однос на декември. Од тогаш се чини дека трговијата почна да се опоравува.
Во март трговската размена со ЕУ порасна за 1,8 милијарди фунти во однос на февруари.
Сепак, фирми од повеќе сектори имале тешкотии и доцнења поради новите проверки и бирократски процедури.