Забранети ниски прелети над Монблан

Ниските прелети од француската страна на Монблан од сега се забранети, соопштија локалните власти.

Државата формира зона во која од 1 јуни до 15 октомври е предвидена забрана за низок прелет над Монблан, освен за електрични авиони.

Одлуката е донесена по апелот кој на 13 април го упатија градоначалниците на алпските општини Шамони и Сен-Жерве, поради „вистински воздушни состаноци“ на глечерите на Монблан.

Подрачјето на забрана се сведува на областите од кои се приоѓа до „покривот“ на Западна Европа кој се издига на 4810 метри, но локалните претставници не се задоволни од одлуката.

„Одговорот е многу парцијален и не е задоволителен. Бараме ограничување на воздушните активности на целиот масив на Монблан, не знам на кој јазик треба да го кажам тоа“, изјави градоначалникот на Шамони Ерик Фурние.

Тој како пример наведе дека пилотите вчера оставиле две лесни летала кои се блокирале на глечерот Вале Бланш.

„Сакаме во иднина на избегнеме вакво однесување“, рече Фурние.

Во последните години, превезувањето туристи со мали авиони на глечерите или дури и во непосредна близина на Мон Блан предизвика гнев кај локалните власти.