Над 2.000 новозаразени во Грција, потврдени 67 нови случаи со делта сојот

Веќе трет ден во Грција, бројот на новозаразени со коронавирус бележи нагорен тренд, а денеска по пауза од месец и половина се регистрирани над 2.000 нови случаи на ковид-19, а потврдени се и уште 67 случаи од делта сојот.

Според официјалните податоци од Националната организација за јавно здравје на Грција, во изминатите 24-часа регистрирани се 2.107 новозаразени, починаа десет лица, а 153 се приклучени на апарати.

Грчки тинејџери се заразиле со коронавирус на забава на островот Иос

Најголемиот број, повеќе од половина нови случаи, односно 1.115 се во областа Атика, поширокиот регион на Атина, а 241 на островот Крит.

Најголемиот број случаи на делта-сојот се регистрирани во градот Ираклио на Крит и во Атика, но ги има и во други градови.

Просечната возраст на новозаболените се намалила за 10 години и сега изнесува 23 години, а секој десетти хоспитализиран е помлад од 24 години. Во земјата има околу 9000 активни случаи.