Парламентарни избори во Бугарија
Предвремени парламентарни избори се одржуваат денеска во Бугарија, на кои учестуваат 17 партии и шест коалиции. Право на глас во земјата имаат 6.711.048 луѓе на изборите кои беа закажани откако на претходните одржани на 4 април оваа година, ниту една партија или коалиција не успеа да формира влада.
До девет часот одзивот е девет проценти. На изборите гласаа службениот премиер Стефан Јанев и лидерите на Бугарската социјалистичка партија Корнелија Нинова и Христо Иванов на прозападната партија Демократска Бугарија.
„Се надевам дека ќе се формира кабинет по изборите. Сè зависи од предвидлив и стабилен кабинет“, изјави Јанев.
Тесна трка пред предвремените парламентарни избори во Бугарија
Сè уште не се знае дали поранешниот премиер Бојко Борисов ќе гласа јавно, како и лидерот на партијата што се смета за фаворит „Има таков народ“ Слави Трифонов.
Овие избори во Бугарија се први во поновата политичка историја на кои ќе се гласа преку машини, според измените на Изборниот законик. Доколку се задржи вообичаената изборна активност се очекува околу три милиони луѓе да го искористат своето право на глас преку електронските уреди. Машинското гласање ќе се одржи во 9.401 секција, а во странство во 273 избирачки места.
Според анкетите се очекува во 46-то Народно собрание да влезат шест до седум партии, со оглед дека три партии и една коалиција се близу до прагот од четири проценти кој е потребен за влез во Парламентот.
Ова се 12-ти парламентарни избори по соборувањето на комунистичкиот диктатор Тодор Живков есента 1989 година.