ОН донесе резолуција за хуманитарна помош во Сирија

Советот за безбедност на ОН одобри продолжување на операцијата за прекугранична помош за милиони очајни луѓе во Сирија. Одлуката беше донесена откако Русија во последен момент се согласи на компромис во разговорите со Соединетите држави, потег кој во телефонски разговор го поздравија претседателот на САД Џо Бајден и неговиот руски колега Владимир Путин.

Гласањето на Советот за безбедност на 9 јули обезбеди пристап за помош на ОН до Сиријците во период од 12 месеци и доаѓа непосредно пред истекот на мандатот на Советот на 10 јули.

Амбасадорката на САД во Обединетите нации Линда Томас-Гринфилд и рускиот амбасадор на ОН Василиј Небенсија на 9 јули постигнаа компромис за резолуцијата.

Неодржлива ситуација со затворените борци на Исламската држава во Сирија

Двете земји потоа го претставија договорот пред 15-члениот Совет за безбедност, кој едногласно го усвои. Резолуцијата одобрува испораки на помош до северозападен Идлиб преку преминот Баб ал-Хава на границата меѓу Сирија и Турција.

Во резолуцијата се вели дека генералниот секретар на ОН, Антонио Гутереш за шест месеци мора да изготви извештај за „транспарентноста“ на операцијата за помош и за испораките преку конфликтните линии. Но, според резолуцијата не е потребно повторно гласање за шест месеци за продолжување на операцијата, рекоа дипломатите.