КСС до Заев- наместо да кажувате дека администрацијата е корумпирана, зголемете ги платите
![КСС до Заев- наместо да кажувате дека администрацијата е корумпирана, зголемете ги платите](https://gdb.rferl.org/FFA8C39F-212A-4CF5-96AF-E68E93AECC13_w800_h450.jpg)
Конфедерацијата на слободни синдикати на Македонија (КСС) соопшти дека „остро се спротивставува“ на изјавата на претседателот на Владата, Зоран Заев дека корупцијата не постои во високите ешалони на власта, туку кај административните службеници.
„Што и да речете, на кого и да ја префрлате вината, Вашата Влада, заедно со министерствата и државните органи се оние кои што се корумпирани. Самата корупција потекнува од избраниците на премиерот кои пак вршат политички притисок врз вработените во јавниот сектор. Корупцијата никогаш не може да се случува од долу па нагоре, туку обратно, бидејќи јавните набавки и тендерите се во рацете на функционерите коишто се избрани од страна на Владата“, се наведува во соопштението од КСС.
Премиерот тврди дека нема корупција во највисокиот ешалон на власта
Од КСС меѓу другото посочуваат дека многу пати во минатото кажувале дека од 120.000 вработени во јавниот сектор, 58.000 вработени државни службеници земаат плата од 15.000 до 17.000 денари, сума со која што, според нив, не можат ни да ги покријат основните трошоци за живот, со оглед на тоа дека „имаме поскапување на најголемиот дел од производите кои што ни се потребни за да преживееме“.
„Наместо да кажувате дека административните службеници се корумпирани, зголемете им ги платите и конечно направете дигитализација на администрацијата и престанете да вршете притисоци врз нив преку вакви изјави. Доколку продолжите вака да ги обвинувате административните службеници, наскоро ќе се соочите со нивниот револт кој што верувајте дека нема воопшто добро да се одрази врз функционирањето на системот во државата“, наведуваат од Конфедерацијата на слободни синдикати.
Истрагите за корупција на власта го демантираат премиерот
Премиерот Заев неодамна прашан за извештајот на Стејт департментот за инвестициска клима за 2021 година во кој меѓудругото се нотира и дека корупцијата е постојан проблем за водење бизнис во Македонија, рече дека во највисокиот ешалон на власта, па дури и во вториот ешалон не е препознаена корупција. Тој додаде дека кај министрите и кај директорите не е пронајдена корупција, туку дека таа е пронајдена во делот на административното функционирање на јавните институции.