مسکو کې د اورلګېدنې په پېښه کې ۴ تاجکستاني وګړي وژل شوي
د روسیې د څېړنو د کمېټې ویاندې اولګا ورادي وايي، د یکشنبې په ورځ د اورلګېدنې په دې پېښه کې یوه ۴۸ کلنه تاجکستانۍ مېرمن او د هغې یو شپږ کلن لمسی وژل شوي دي.
د نوموړې په وینا، یوه ۴۸ کلن تاجکستاني سړي او د هغه ۱۳ کلن زوی وروسته په روغتون کې د سوځېدنې له کبله ساه ورکړې ده.
د روسیې د څېړنو د کمېټې د ویاندې په وینا، دغو تاجکستاني وګړو دا اپارتمان په کرایه نیولی و او د اور د لګېدو د علت په اړه څېړنې روانې دي.