سادات: د نوماندانو د لومړني لېست د اعلان لپاره تیارۍ بشپړې شوي
د دغه کمېسیون یوه ویاند ذبیح سادات تېر ماښام ازادي راډیو ته وویل چې پهدې اړه د کمېسیون د مشرانو د پریکړې په تمه دي.
دی وايي:
"د ټاکنو خپلواک کمېسیون تصمیم لري چې د ولسمشرۍ انتخاباتو د نوماندانو لومړنی لېست نن خپور کړي. پهدې اړه ټولې تخنیکې چارې بشپړې شوي دي. یوازې د مشرانو پریکړې ته اړیو، څو د ولسمشرۍ ټاکنو د مهالویش پر اساس نن د سلواغې شپاړسمه موږ د ولسمشرۍ انتخاباتو د کاندیدانو لومړنی لېست خپور کړو."
د ښاغلي سادات تر دې څرګندونو څو ساعته وړاندې د انتخاباتو د خپلواک کمېسیون یوې مرستیال ویاندې شیما علم سروش وویل چې د ثبت شویو کسانو د تابعیت په اړه نابشپړې ارزونې ښایې د دغه لومړني لېست اعلان له ځنډ سره مخامخ کړي.
د افغانستان د انتخاباتو خپلواک کمېسیون ویلي چې ولسمشرۍ انتخابات به د راتلونکي لمریز کال د چنګاښ په ۲۹مه ترسره کوي.
پهدغو انتخاباتو کې د سیالۍ لپاره ۱۸ کسانو خپل نومونه ثبت کړي دي.