د امریکا د بهرنیو چارو وزیر د ایران ادعا بې بنسټه بللې
د چهارشنبې په ورځ په سیستان او بلوچستان ایالت کې د ایران د سپاه پاسداران د موټرو پر یوه کاروان په ځان وژونکي حمله کې د دې ځواک ۲۷ افسران ووژل شول.
د دې برید مسوولیت د جیش العدل په نوم یوې بیلتونپالې سني افراطي ډلې منلی دی خو د ایران د بهرنیو چارو وزیر جواد ظریف پرون پنجشنبې په یو مرکه کې وویل، د دې حملې او په وارسا کې د منځني ختیځ په اړه د جوړ شوي کنفرانس ترمنځ اړیکه شته.
د امریکا او پولنډ د بهرنیو چارو وزیران- مایک پامپیو او یاڅیک زاپوتوویچ Jacek Czaputowicz د دې غونډې کوربانه وو.
پامپیو د ازادي راډیو له فردا څانګې سره په مرکه کې په دې حمله کې چې په څو کلونو کې بیسارې وه، د امریکا لاس لرل رد کړل او ویې ویل چې متحدایالات له دې حمله کې قطعا لاس نه لري.