میسي د شپږم ځل لپاره د طلایي توپ جایزه واخیسته
د نړۍ د فوټبال نامي ستوري لیونیل میسي ته د شپږم ځل لپاره د طلایي توپ جایزه ورکړل شوه.
۳۲ کلن میسي ته دا جایزه پرون د ډسمبر په دوهمه نېټه په پاریس کې د ځانګړو مراسمو په ترڅ کې ورکړل شوه.
میسي په ۲۰۱۹ میلادي کال کې تر اوسه د بارسلونا د فوټبال کلپ او د خپل هېواد ارجنټاین لپاره په ۵۹ لوبو کې ۴۶ ګولونه وهلي دي.
هغه دا جایزه پنځه ځلې مخکې له دې، په ۲۰۰۹، ۲۰۱۰، ۲۰۱۱، ۲۰۱۲ او ۲۰۱۵ میلادي کلونو کې هم ګټلې په داسې حال کې چې د ده سیال کریستیانو رونالډو پنځه ځلې دا ویاړ ترلاسه کړی.
همداراز د امریکا د فوټبال ښځینه لوبغاړې میګان راپینوی ته- چې سږکال یې په فرانسه کې د فوټبال په نړیوال جام کې د خپل ټیم د مقام دفاع وکړه، هم د طلایي توپ جایزه ورکړل شوه.