چارواکي: لا هم جوزجان کې افغان سرتېري کلابند دي
د جوزجان ولايت چارواکي وايي لا هم په درزاب ولسوالۍ کې کلابند سرتېري بل ځاى نه دي انتقال شوي.
د جوزجان د والي وياند عبدالمعروف اذر نن سهار ازادۍ راډيو ته وويل، په پام کې وه، دغه سرتېري د خلکو په غوښتنه شبرغان ښار ته ولېږدول شي.
هغه وايي: "دوى تر اوسه نه دي لېږدول شوي، ويل شوي وو چې دوى به انتقالېږي، پر دې پرېکړه شوې چې تر بل امر پورې دې عمليات ودرول شي، د خلکو په غوښتنه به ولېږدول شي."
د افغانستان دفاع وزارت ويلي وو چې تر پرون ماښام پورې به دغه سرتېري سم د لاسه اکمال شي.
خو په درزاب کې د محلي پوليسو يو قوماندان نصرت اله وايي، دوى اوس هم اکمالاتو ته په تمه دي.
دغه قوماندان وايي که تر نن غرمې اکمالات ونه شي هوا به ورېځ شي او تر يوې اوونۍ به شا و خوا ٣٠٠ سرتېري چې کلابند شوي، له سختو ستونزو سره مخامخ شي.