ملي امنیت: له اسلم فاروقي سره ۲ نور بهرني وګړي هم نیول شوي
دا اداره په یوه بیان کې چې نن سهار خپره شوه وايي چې د ځانګړو عملیاتو په ترڅ کې بنګلدېشی محمد تنویر او پاکستانی علي محمد هم له فاروقي سره یوځای نیول شوي دي.
بیان زیاتوي تنویر چې د عمران، احمد او نصیر په مستعارو نومونو مشهور و، د داعش ډلې د ټکنالوژۍ او مخابراتو د برخې مسوول او علي محمد د دې ډلې د اکمالاتو، انتقالاتو او لوژستیک د چارو مشر و.
ملي امنیت وايي چې له دې دوو کسانو او فاروقي څخه تحقیقات روان دي.
د داعش ډلې د خراسان څانګې مشر اسلم فاروقي تېره اوونۍ د ملي امنیت د ځواکونو له خوا په کندهار کې ونیول شو او د پنجشنبې په ورځ پاکستان غوښتنه وکړه چې نوموړی دې اسلام آباد ته وسپارل شي خو د هغې ورځې په سبا د بهرنیو چارو سرپرست وزیر حنیف اتمر دا غوښتنه رد کړه.