له هندوستانه - افغانستان ته د لېږدول شویو کسانو شمېر ۳۴۰۰ تنو ته ورسېد
د کرونا ویروس له کبله د محدودیتونو په خاطر په هندوستان کې بند پاتې۲۵۰ نور افغانان هم افغانستان ته لېږدول شوي.
په داسې حال کې چې ګڼ شمېر افغانان د کرونا ویروس د خپرېدو له کبله په هندوستان کې بند پاتې دي، په نوې ډلي کې د افغانستان سفارت دې هېواد ته د ۲۵۰ نورو افغانانو د ستنولو خبر ورکوي.
له دې سره له هندوستانه- افغانستان ته د ستنو شویو شمېر درې زره څلور سوه شو.
په نوې ډیلي کې د افغان سفارت شارزدافېر طاهر قادري له ازادي راډيو سره په خبرو کې وویل چې افغانستان ته د ستنېدو په برخه کې هغو کسانو ته لومړیتوب ورکول کېږي چې په تېرو ۴ میاشتو کې په سیل یا د درملې لپاره دغه هېواد ته ورغلي.
ښاغلي قادري زیاته کړه: "د افغان اریانا هوايي شرکت په الوتکه کې مو په دوولسم پرواز کې دوه نیم سوه افغانان هېواد ته ستانه کړل، دا هغه کسان وو چې دلته بند پاتې وو او د ستنېدو لومړیتوب ورکړل شوی وو لکه سیلانیان یا ناروغان چې د درملې لپاره راغلي وو، د مې میاشتې تر لومړۍ نېټې درې نور پروازونه لرو چې مستحق کسان به افغانستان ته ولېږل شي."
د ښاغلي قادري په وینا، اوسمهال د هندوستان حکومت دا مشوره ورکړې چې بهرني محصلین باید په هندوستان کې پاتې شي ځکه امکان لري وضعیت د سمېدو خوا ته لاړ شي.
په داسي حال کې چې د کرونا ویروس د خپرېدو اندېښنه شته، د هندوستان ټایمز ورځپاڼې د راپور له مخې کابل ته له رسېدو وروسته به د ټولو کسانو معاینات وشي.
افغانستان هڅه کوي په نورو هېوادونو کې بند پاتې وګړي راستانه کړي.
په چين کې د افغانستان د سفیر جاوېد قایم په وینا د تیرې پنجشنبې په شپه هغه افغان سوداګر چې غوښتل يې د روژې میاشت له خپلو کورنیو سره تېره کړي، له پېکېنګ څخه کابل ته انتقال شول.
د یکشنبې تر ورځې د عامې روغتیا وزارت په افغانستان کې په کرونا ویروس د اخته کسانو شمېر ۱۵۳۱ اعلان کړی.
د دې وزارت د معلوماتو له مخې د کرونا ویروس له کبله د مړو شویو شمېر ۱۵۰ او د رغېدلو شمېر ۲۰۷ دی.