د غزني اوسېدونکي: ۳ کسه لاریون کونکي وژل شوي
د غزني ولایت د جاغوري ولسوالۍ اوسېدونکي وايي، په لاریونوالو د برید په ترڅ کې ۳کسان وژل شوي او ۳ نور ټپیان شوي دي.
دوی وايي، دغه برید له ناڅرګند لوري شوی دی.
د دغه ځای یوه اوسېدونکي محمد جمعه همدر ازادي راډیو ته وویل: "دلته ډزې شوې دي، خو ډزې مالومې نه دي چې دا ډزې اردو، پولیسو، د ملي امنیت منسوبینو او که د ولسوال ساتونکو کړې دي، امنیه قومندان، ولسوال، له جنايي جرمونو سره د مبارزې امر او ځینو پولیسو په جومات کې پناه اخیستې ده، دولت تر اوسه پورې هېڅوک هم د پېښې په تړاو نه دي نیولي، تر اوسه درې نفره وژل شوي او درې ټپیان دي."
د غزني امنیه قومندان محمد خلیل اندرابي وايي، په دې اړه څېړنې پیل شوي او په خبره یې د دغه ولسوالۍ لپاره امنیه قومندان او ولسوال دواړه له دندو لرې کړای شوي دي.
د سیمې خلک وايي له نن څخه درې ورځې وړاندې د یادې ولسوالۍ په مرکز کې دوو تنو پولیسو پر دوو نجونو جنسي تېری کړی دی.
دوی وايي، د یادې قومندانۍ پولیسو په رنجر کې دوه نجونې په زوره سپرې کړې او قومندانۍ ته یې وړې وې چې د سیمې خلکو له هغه وروسته په اعتراضونو لاس پورې کړ.
جاغوري د غزني مرکز شمال لویدیځ لور ته پرته غرنۍ ولسوالي ده چې ډېری اوسېدونکي یې لوستي او په دولتي دندو کار کوي.