افغان کرکټ ملي لوبډله د زېمبابوې په وړاندې ۲۰ اووره مسابقو ته چمتووالی نیسي
د افغانستان کرکټ بورډ وايي د کرکټ ملي لوبډله د زېمبابوې په وړاندې درېیو ۲۰ اووره مسابقو ته په چمتووالي بوخته ده.
د دواړو هېوادونو ترمنځ تر دوو ټېسټ لوبو وروسته به دغه لوبډلې، لومړۍ ۲۰ اووره مسابقه راروانه چهارشنبه وکړي.
د کرکټ بورډ ویاند فرید هوتک ازادي راډیو ته وویل: "له دې وروسته به د افغانستان او زېمبابوې د کرکټ ملي لوبډلو ترمنځ د افغانستان په کوربهتوب درې نړیوالې ۲۰ اووره مسابقې وشي چې دا مسابقې به د متحده عرب اماراتو په شېخ زاید کرکټ لوبغالي کې وشي."
افغانستان له زېمبابوې دوهمه ټېسټ لوبه پرون د شپږو وېکټو په توپیر وګټله، خو افغانستان لومړۍ ټېسټ لوبه بایللې وه.