د مسکو جوړېدونکې غونډه کې له افغانستان څخه څوک ګډون کوي؟
د مسکو غونډه کې به د ملي مصالحې عالي شورا رئیس عبدالله عبدالله په مشرۍ ۱۲ کسیز پلاوی ګډون وکړي.
د افغانستان د مرکچي پلاوي یو غړی وايي، دې پلاوي کې د مخکېني جمهور رئیس حامد کرزي سربېره، د ولسي جرګې رئیس، د ځینو ګوندونو مشران او د افغانستان د سولې مرکچي پلاوي یو شمېر غړي شامل دي.
د افغانستان د مرکچي پلاوي یو غړي د خپل نوم او غږ نهخپرېدو په شرط ازادي راډیو سره د مسکو په غونډه کې د ګډون کوونکي پلاوي نوملړ شریک کړ.
دی پلاوی وايي،
د ملي مصالحې عالي شورا رئیس عبدالله عبدالله
مخکېنی جمهور رئیس حامد کرزی
د ولسي جرګې رئیس میر رحمان رحماني
د جمهور رئیس غني مخکېنی لومړی مرستیال مارشال عبدالرشید دوستم
د جمهوري ریاست پخوانی دوهم مرستیال محمد کریم خلیلي
د حزب اسلامي مشر ګلبدین حکمتیار
د سولې په چارو کې د دولت وزیر سید سعادت منصور نادري
د افغانستان دولت د سولې مرکچي پلاوي رئیس محمد معصوم ستانکزی
د مرکچي پلاوي غړي نادر نادري
حبیبه سرابي
متین بېک
او د مشرانو جرګې لومړی مرستیال محمد علم ایزدیار
هغه کسان دي چې تمه ده د مسکو غونډه کې ګډون وکړي.
افغان حکومت تر اوسه په رسمي توګه د دغه ۱۲ کسیز پلاوي په اړه تبصره نهده کړې.
په ورته وخت کې د ملي مصالحې عالي شورا وايي، یو لوړپوړی پلاوی به سبا د چهارشنبې په ورځ د ملي مصالحې عالي شورا د رئیس عبدالله عبدالله په مشرۍ مسکو ته ولاړ شي.
د دې شورا سلاکار مجیبالرحمن رحیمي رسنیو ته په لېږلي پیغام کې ویلي، له یو شمېر سیاسیونو پرته به، د افغانستان اسلامي جمهوري پلاوی په یوه دریځ دې غونډې ته ورشي.
ښاغلی رحیمي زیاتوي: "په دې غونډه کې یو شمېر سیاسیون او مشران بلل شوي دي، خو د افغانستان اسلامي جمهوریت د ملي مصالحې عالي شورا تر چتر لاندې دې غونډه کې ګډون کوي او د افغانستان اسلامي جمهوریت لیدلوری به په یوه واحد دریځ کې مطرح شي."
بلخوا د امریکا د بهرنیو چارو وزارت وايي، د متحده ایالاتو په استازولۍ به د مسکو غونډه کې زلمی خلیلزاد ګډون وکړي.
د امریکا د بهرنیو چارو وزارت د ویاند مرستیالې جېلنیا پورتر د مارچ په ۱۵مه، دا ناسته د افغانستان د سولې لپاره د نړیوال ملاتړ د را خپلولو یوه هڅه وبلله.
هغې زیاته کړه: "موږ له خپلو سیمهییزو او نړیوالو همکارانو سره پر دې بوخت یوو چې د سیاسي جوړجاړي لپاره پرمختګ ګړندی کړو. د دې بهیر د دوام لپاره زموږ هڅې روانې دي."
د مسکو غونډه داسې مهال جوړېږي چې امریکا د افغانستان د سولې بهیر د ګړندي کولو لپاره د سیمې او نړۍ اجماع مهمه بللې ده.
د امریکا د بهرنیو چارو وزیر انتوني بلېنکن د همدې اجماع د پیاوړتیا لپاره په ترکیه کې د افغانستان، امریکا، روسیې، چین، هند، ایران او پاکستان په ګډون د یوې غونډې د جوړېدو غږ کړی چې تمه ده د اپرېل میاشتې په لومړیو کې جوړه شي.
په ورته وخت کې د افغانستان د بهرنیو چارو وزارت نن د سې شنبې په ورځ په یوه خپره کړې اعلامیه کې د افغانستان د سولې په اړه د مسکو او ترکیې له غونډو هرکلی کړی دی.
په اعلامیه کې زیاته شوې: "په روسیه او ترکیه کې د افغانستان د سولې خبرو کېدل، د قطر پروسې بدیل نه، بلکې د هغه بهیر بشپړونکې دي."
د مسکو غونډه د پنجشنبې په ورځ کېږي.
د دې غونډې هدف د افغانستان د سولې خبرو چټکتیا، د تاوتریخوالي پای ته رسېدل او یوه معنی لرونکي پړاو ته د سولې خبرو دننه کېد بلل شوي دي.
د مسکو غونډه د روسیې، امریکا، چین او پاکستان ترمنځ کېږي، خو د طالبانو په ګډون، افغان حکومت او یو شمېر سیاسیون هم وربلل شوي دي.
طالبانو هم ویلي، د ملا عبدالغني برادر په مشرۍ بهیې یو لسیز پلاوی دې غونډه کې ګډون وکړي.