مسکو غونډه کې د ګډون لپاره افغان دولتي پلاوي سفرونه پیل کړي
دوی د هغه ۱۲ کسیزه پلاوي لومړني کسان دي چې د مسکو غونډه کې د افغانستان د دولت استازیتوب کوي.
د ملي مصالحې عالي شورا وایي، دا پلاوی چې مشري یې د یادې شورا مشر عبدالله عبدالله کوي، نن (د مارچ پر ۱۷مه) مسکو ته ځي.
د دې شورا سلاکار مجیبالرحمن رحیمي رسنیو ته په لېږلي پیغام کې ویلي، پر يو شمېر سياستوالو سربېره به د افغانستان پلاوی په یوه دریځ دې غونډې ته ورشي.
رحیمي د هغو پاتې کسانو نومونه هم تایید کړل چې د افغان دولت په استازيتوب به د مسکو په غونډه کې ګډون کوي.
په دې نوملړ کې:
د افغانستان پخوانی ولسمشر حامد کرزی. د افغان ولسمشر پخوانی لومړی مرستیال مارشال عبدالرشید دوستم . د افغان ولسمشر پخوانی دوهم مرستیال محمد کریم خلیلي. د حزب اسلامي مشر ګلبدین حکمتیار. د سولې په چارو کې د دولت وزیر سید سعادت منصور نادري. د افغان دولت د سولې مرکچي پلاوي مشر محمد معصوم ستانکزی. د افغان دولت د سولې مرکچي پلاوي غړی نادر نادري. حبیبه سرابي. متین بېک. او د مشرانو جرګې لومړی مرستیال محمد علم ایزدیار د دې پلاوي نور غړي یاد شوي دي.
دا غونډه چې سبا (د مارچ پر ۱۸مه) د مسکو په کوربه توب جوړیږي، د امریکا، روسیې، چین او پاکستان لوړپوړي ډیپلوماټان هم وربلل شوي دي.
د امریکا د بهرنیو چارو وزارت وايي، د افغانستان د سولې لپاره د امریکا ځانګړی استازی زلمی خلیلزاد به د دې هېواد په استازیتوب په مسکو غونډه کې ګډون کوي.
خلیلزاد د افغانستان د سولې هڅو د یوې برخې په توګه کابل ته خپل دوه ورځنی سفر پرون (د مارچ پر ۱۶مه) پای ته ورساوه.
امریکا د مسکو ناسته د افغانستان د سولې لپاره د نړیوال ملاتړ د را خپلولو یوه هڅه بولي.
طالبانو هم ویلي چې په قطر کې د دې ډلې د سیاسي دفتر مشر ملا عبدالغني برادر په مشرۍ لس کسیزه پلاوی به د مسکو په غونډه کې ګډون وکړي.
دا خبرې داسې مهال کېږي چې د افغانستان د وضعیت په اړه بحثونه حساس پړاو ته رسېدلي دي.
د امریکا د بهرنیو چارو وزیر اېنټوني بلينکېن د افغانستان د سولې په اړه د سیمه ییزې او نړیوالې اجماع د پیاوړتیا لپاره په ترکیه کې د افغانستان، امریکا، روسیې، چین، هند، ایران او پاکستان په ګډون د یوې غونډې د جوړېدو غږ کړی چې تمه ده د اپرېل میاشتې په لومړیو کې جوړه شي.
په ورته وخت کې د افغانستان د بهرنیو چارو وزارت پرون په یوه اعلامیه کې د افغانستان د سولې په اړه د مسکو او ترکیې له غونډو هرکلی کړی دی.