نړیوال بانک افغانستان، بنګله دیش او نیپال کې د کرونا ضد واکسین تمویلوي
![نړیوال بانک افغانستان، بنګله دیش او نیپال کې د کرونا ضد واکسین تمویلوي](https://gdb.rferl.org/bad0a1f8-4412-4b13-81cd-71109196a88b_cx0_cy1_cw0_w800_h450.jpg)
نړیوال بانک اعلان وکړ چې په افغانستان، بنګله دیش او نیپال کې د کووېډ- ۱۹ ضد واکسین تمویلوي.
په نړیوال بانک کې د افغانستان د څانګې مشر هنري کرالي ویلي چې د افغانستان لپاره ۱۱۳ میلیونه ډالره په پام کې نیول شوي چې ۶۰ میلیونه ډالر یې د نړیوال پراختیایي سازمان له خوا ورکول کېږي.
د ښاغلي کرالي په خبره نړیوال بانک د افغانستان له حکومت او خپلو متحدینو سره یوځای د کووېډ- ۱۹ ناروغۍ د درملنې او ټېسټونو د شرایطو د ښه کېدو لپاره کار کوي، څو د افغانستان روغتیایي سیستم پیاوړی شي.
نړیوال بانک ویلي چې دا اقدام واکسین ته د میلیونونو افغانانو د لاسرسي لپاره ډېر مهم دی.
په عمومي ډول نړیوال بانک په مخ پر ودې هېوادونو کې د کووېډ- ۱۹ ناروغۍ د درملنې، ازموینې او د واکسین د ویش برخې ته ۱۲ میلیارده ډالره ځانګړي کړي دي.