غني: ایران ته وړیا اوبه نه ورکوو، د تېلو یا نورو توکو په بدل یې پلورو
ښاغلي غني دا څرګندونې نن چهارشنبه (د وري ۴مه) نیمروز ولایت کې د کمال خان بند له پرانېستلو وروسته یوه ولسي غونډه کې وکړې.
نوموړي وویل، اوس تر پخوا د اوبو مدیریت ته ښه زمېنه برابره شوې ده: "اوس اعتماد د دې پيدا شوی چې انشاالله د افغانستان ټولې اوبه به مهار شي، سږ کال نا معلوم دی، له ملي شورا مې غوښتنه دا ده چې ملاتړ مې وکړئ چې د افغانستان اوبه مدیریت کړو او په ټینګه یې مدیریت کړو"
کمال خان بند د نیمروز په چهار بورجک ولسوالۍ کې پروت دی چې له مرکز زرنج څخه شاوخوا شل کیلو متره واټن لري.
دا بند د ۵۲ میلیون مکعب متر اوبو د زېرمه کولو او د یولک او ۷۴ زره هکتاره ځمکې د خړوبولو وړتیا لري او تر څنګ یې نهه میګاواټه بریښنا تولیدولای شي.