له جرمني ۲۷ تنه ایستل شوي افغانان کابل ته راورسېدل
۲۷ تنه افغانان چې له جرمني څخه اېستل شوي دي نن چهارشنبه (د چنګاښ په ۱۶مه نېټه)کابل ته ورسېدل.
د جرمني 'ډي.پي.اې' خبري اژانس د حامد کرزي د نړیوال هوايي ډګر د چارواکو په حواله خبر ورکوي چې د دې افغانانو لپاره ځانګړې یا چارتر الوتکه سهار وختي په کابل کې کېناسته.
اژانس وايي، نننۍ الوتنه، له ۲۰۱۶ کال راهیسې له جرمني د اېستل شوېو افغانانو څلوېښتمه الوتنه ده چې په ټوله کې ۱۱۰۴ افغان پناه غوښتونکي یې له دې هېواده افغانستان ته لېږدولي دي.
په وروستیو څو کلونو کې زرګونه افغانان د عراق، سوریې، پاکستان او افریقايي هېوادونو له وګړو سره یوځای د یوې ښې راتلونکې په تمه اروپايي هېوادونو ته ځي، خو په دې هېوادونو کې د کډوالو په قوانینو کې د نوېو محدودیتونو له کبله اکثر دا کسان نه منل کېږي او ډېری خپلو هېوادونو ته ډیپورت کېږي.