طالبانو د جبري حجاب په اړه د حکمتيار وروستیو څرګندونو ته غبرګون وښود
د طالبانو د حکومت له خوا پر ښځو د جبري حجاب په اړه، د حزب اسلامي د مشر ګلبدین حکمتیار ورستیو څرګندونو ته غبرګون!
وروسته له هغې، چې د حزب اسلامي ګوند مشر ګلبدین حکمتیار د طالبانو د حکومت له خوا د ښځو د جبري حجاب په اړه څرګندونې وکړې، د طالبانو د امر بالمعروف او نهی عن المنکر وزارت ویاند محمد صادق عاکف مهاجر په خپله ټویټر پاڼه ولیکل: "د حزب اسلامي غړو به په کابل او د پاکستان په شمشتو کمپ د هغو خویندو پر مخ تېزاب شیندل چې مخونه به یې لوڅ و."
عاکف مهاجر د شنبې په ورځ په خپله ټوېټر پاڼه دا هم ولیکل: "په شمشتو کمپ کې به یې هغه دوکانداران نیول، چې به غیر له محرم ښځې باندې به یې سودا خرڅوله او دوکان به یې بندولو."
نوموړي دا ادعا وکړه، چې حکمتیار د معلوماتو له نشت سره مخ دی او په خبره یې له دیني درسګاوو لرې پاتې دی.
خو مهاجر بیا شېبه وروسته دغه ټویټونه له خپلې پاڼې پاک کړل او تازه یې له ازادي راډیو سره په خبرو کې وویل، چې د حکمتیار خبرې د تبصرې وړ نه دي.
نوموړي دا هم وویل، چې په ټویتر یې لیکل شوي موارد شخصي نظر دی او د وزارت د رسمي دریځ څرګندويي نه کوي.
د افغانستان د حزب اسلامي مشر ګلبدین حکمتیار د تیرې جمعې په ورځ د جمعې خطبې پر مهال ویلي، چې طالبان دې پر ښځو او نجونو ځانګړې جامې نه تحمیلوي.
هغه ویلي: "د مخ، لاسونو او پښو پټول د ښځو حجاب کې نه شاملېږي. د اسلامي امارت مسوولینو ته سپارښتنه کوو چې مه داسې خاص ډول جامه پر افغانانو - مخصوصاً پر نجونو او ښځو تحمیلوئ چې نه په قران او سنت کې د هغې په اړه صریح نصح شته او نه یې د وجوب او تحریم په اړه کوم امر او نهی."
د حزب اسلامي مشر وايي، فشار او ګواښونو ته اړتیا نه شته او خلک باید قانع کړل شي.
له دې وړاندې د افغانستان یو شمېر مخورو شخصیتونو لکه پخواني ولسمشر حامد کرزي هم د طالبانو له لوري د حجاب په اړه صادر شوي فرمان ته غبرګون ښودلی و.
نوموړي له یوې امریکايي رسنۍ (سي اين اين ) سره په مرکه کې ویلي و، چې د طالبانو لخوا وړاندیز شوې جامې شرعي او دیني اړخ نه لري.
د طالبانو حکومت د روان لمریز کال په غويي میاشت کې د شرعي حجاب اړوند د لندي توضیحي او تطبیقي طرحې په نوم یوه طرحه خپره کړې، چې په دې طرحه کې چادري د حجاب تر ټولو ښه بڼه ښودل شوې او په کې راغلي، هر ډول جامه چې بدن پټ کړي او چسپ نهوي، حجاب ګڼل کېږي.
په دغه تطبیقي طرحه کې دا هم راغلي، کومې ښځې چې حجاب نه مراعتوي نو ولي به يې مجازات شي.
د یادونې ده، چې پر ښځو د طالبانو د حکومت له خوا د جبري حجاب موضوع ته له افغانستان بهر نړیوالو هم پراخ غبرګونونه وښودل او په دغه هېواد کې یې بشري وضعیت د اندېښنې وړ وباله.