د روسیې ولسمشر له خپلو ایراني او ترکي سیالانو سره ګوري
د روسیې ولسمشر ولادیمیر پوتین تهران ته رسېدلی او نن به له خپلو ایراني او ترکي سیالانو ابراهیم رییسي او رجب طیب اردوغان سره وګوري.
تمه ده، چې د دوی په کتنه کې به د ملګروملتونو د هغې طرحې په اړه پر خبرو تمرکز وشي چې غواړي د اوکراین د غلې صادرات بیا پیل او په نړۍ کې د خوړو روان بحران اوار شي.
درې واړه مشران به د سوریې د کړکېچ په اړه هم خبرې وکړي.
دا غونډه د سوریې په اړه د آستانې د خبرو په چوکاټ کې پلان شوې.
پوتین به د ایران له لوی مذهبي مشر آیت الله علي خامنه یي سره هم وګوري.
د فبروري په ۲۴مه پر اوکراین له یرغل وروسته دا لومړی ځل دی چې پوتین د پخواني شوروي اتحاد له قلمرو څخه بهر یوه هېواد ته سفر کوي.
د روسیي رسنیو د راپورونو له مخې د پوتین د بهرنۍ پالیسۍ سلاکار په مسکو کې خبریالانو ته ویلي دي، چې د اردوغان او پوتین په کتنه کې د هغه پلان په اړه بحث هم شامل دی چې باید د اوکراین د غلې صادراتو ته اجازه ورکړل شي.
یوري اوشاکوف ویلي دي، چې روسیه په دې برخه کې ګډ کار ته چمتو ده.
روسیې د تورې بحیرې ځینې بندرونه نیولي او د اُدېسې بندر په ګډون پر ځینو نورو یې بمباري کړې ده.
دا په داسې حال کې ده، چې اوکراین هم په خپلو ځینو بندرونو کې ماینونه ځای پرځای کړي څو د روسانو له حملو یې خوندي کړي.
د راپورونو له مخې د اوکراین له بندرونو د غلې د صادراتو د آزادولو په برخه کې د روسیې، اوکراین، ترکیې او ملګروملتونو ترمنځ خبرې یوې نتیجې ته نژدې شوې دي.
ټاکل شوې، چې روسي او اوکرایني مرکچیان سبا د جولای ۲۰مه په استانبول کې د ملګروملتونو او ترکیې له ډيپلوماتانو سره وګوري او د احتمالي نتیجې په اړه خبرې وکړي.
د روسیې دفاع وزارت د جمعې په ورځ وویل، د هغې موافقې اسناد به ډېر ژر چمتو شي چې له مخې یې د اوکراین د غلې او همداراز د روسیې د غلې او سرې صادراتو ته اجازه ورکول کېږي.
د ترکیې د دفاع وزیر خلوصي آکار تایید کړه، چې د روسیې او اوکراین ترمنځ په اصولو کې یوه موافقه ترلاسه شوې ده څو د دواړو هېوادونو د غلې صادرات د یوه خوندي سمندري دهلېز له لارې بهر ولېږدول شي.