د کابل په یوه جومات کې چاودنې لسګونه کسانو ته مرګژوبله اړولې
تېر ماښام د کابل په ۱۷مه حوزه کې په یوه جومات کې د ماښام د لمانځه پر مهال چاودنه شوې ده.
په کابل کې تېر ماښام په یوه جومات کې د لمانځه د اداکولو په مهال چاودنه کې د جومات د مشهور ملا په ګډون لږترلږه لس کسان وژل شوي او لږترلږه ۲۷ کسان ټپیان شوي دي.
د اسوشتیدپرس خبري آژانس د راپور له مخې پولیسو او عیني شاهدانو ویلي چې یوه انتحاري د خیرخانې مېنې په صدیقیه جومات کې ځان الوځولی دی.
یوه عیني شاهد چې نوم یې ندی په ډاګه شوی اسوشتیدپرس آژانس ته ویلي چې په دې پېښه کې د دې جومات مشهور ملا امام امیرمحمد کابلي وژل شوی دی.
ځینو خبریالانو لیکلي چې په پېښه کې چې ځانمرګی برید و، شااوخوا ۳۰ کسان وژل شوي او ۵۰ تنه نور ټپیان دي.
خو د طالبانو د امنیه قوماندانۍ ویاند خالد ځدراڼ ازادي راډیو ته په یوه لېږل شوي پیغام کې پېښه تأیید کړې ده.
ښاغلی ځدراڼ وايي: "د ۱۷مې حوزې په مربوطاتو کې په یوه جومات کې د ماښام لمانځه پر مهال چاودنه شوې چې متأسفانه مرګژوبله هم لري."
خالد ځدراڼ د چاودنې د نوعیت او د مرګژوبلې د دقیق شمېر په باب څه نهدي ویلي، خو زیاتوي چې د دوی ځواکونه سیمې ته رسېدلي او څېړنې روانې دي.
کابل کې ایمرجنسي روغتون پر خپله ټویټرپاڼه لیکلي چې له دغې پېښې ۲۷ وروړل شوي چې له دې ډلې ۲ مړه و چې درېیم هم په روغتون کې ساه ورکړې ده.
العربیه خبري اژانس راپور ورکړی چې په دغې چاودنه کې ۲۰ تنه وژل شوي او ۴۰ تنه نور ټپیان دي، خو دغه شمېرې تر اوسه رسمي سرچینو نهدي تأیید کړي.
د سیمهییزو رسنیو د معلوماتو پر بنسټ د خیرخانې مېنې سر کوتل سیمه کې د ابوبکر صدیق جومات دننه چاودنه شوې ده.
د دغې چاودنې مسؤلیت تر اوسه چا نهدی منلی.
د طالبانو ویاند ذبیحالله مجاهد پر خپل ټویټر په یوه خپاره کړي پيغام کې دا چاودنه غندلې ده.
له دې مخکې د کابل پر دارالامان سړک هم چاودنه وشوه چې د راپورونو پر بنسټ ۲ تنه پهکې ټپیان شوي دي.
که څه هم طالبانو ویلي چې په ټول افغانستان کې یې امن راوستلی او د ناامنیو د پېښو مخهیې نیولې ده، خو په وروستیو کې ځینو امنیتي پېښو خلک اندېښمن کړي دي.