د ملګرو ملتونو امنیت شورا له افغانستانه د "ترهګرۍ ګواښ" په اړه ځانګړې غونډه کوي
امنیت شورا وايي، په غونډه کې د افغانستان د امنیتي وضعیت په اړه د ملګرو ملتونو د سرمنشي راپور وړاندې کېږي.
په راپور کې راغلي چې داعش ډله د افغانستان دننه او بهر یو "لوی ترهګر ګواښ" پېښوي.
د طالبانو حکومت په بیا بیا ویلي دي چې د داعش ډلې ګواښ یې تر ډېره له مینځه وړی دی.
په ۲۰۲۱ز کال کې د طالبانو له واکمنېدو راهیسې د داعش خراسان څانګې په افغانستان کې د ګڼو حملو ذمه واري منلې چې پکې یې د ۲۰۲۴ز کال په ډېسېمبر کې د هغوی د کډوالو چارو د پخواني سرپرست وزیر خلیل الرحمان حقاني د وژنې په ګډون یوشمېر لوړپوړي چارواکي هم په نخښه کړي دي.
داعش له دې پرته په افغانستان کې د شیعه هزاره ګانو په ګډون پر نورو مذهبي لږکیو هم خونړۍ حملې کړې دي.
د ملګرو ملتونو د امنیت شورا د بندیزونو د څار کمېټۍ د ۲۰۲۴ز کال د جولای پر ۲۲مه په خپل رپورټ کې ویلي ول چې د طالبانو تر واکمنۍ لاندې افغانستان د القاعدې او اسلامي دولت (داعش) په څېر د وسلوالو ډلو په "خوندي ځای" اوښتی دی.
خو د طالبانو حکومت ویاند ذبیح الله مجاهد هغه رپورټ رد کړ او و یې ویل چې هغه د ناسمو معلوماتو پر اساس جوړ شوی دی.