منتظر بېټني په غزل او نظم کې بېلابېلې تجربې کړې دي

منتظر بېټنی د خیبر پښتونخوا له هغو شاعرانو بلل کېږي چې په غزل او نظم کې پر داسې وخت بېلابېلې تجربې کړې دي چې په صوبه کې د حمزه خان شینواري، قلندر مومند، اجمل خټک، سیف الرحمان سلیم او اندېش شمس القمر په څېر لوی شاعران او ادیبان موجود ول. ولس هغه د یو شاعر په توګه پېژني خو پوهان یې د ژبې او املا په برخه کې کړی کار خورا ارزښتناک بولي. د منتظر بېټني خپل نوم همېش ګل وو، په ۱۹۳۵ز کال کې زوکړی وو او د ۲۰۲۱ز کال د فبرورۍ پر لومړی ومړ. د هغه دوه شعري ټولګې د ژبپوهنې اړوند دوه کتابونه چاپ شوي. په ۲۰۲۱ز کال کې د بېټ نیکه غورځنګ په نوم ادبي ټولنې د هغه کلیات هم چاپ کړل. د نوموړي د ژوند او کار په اړه دا خپرونه واورئ.