Bislimi: Kontrata Elektrosever-KEDS është hap drejt normalizimit të furnizimit me rrymë në veri

Zëvendëskryeministri i Kosovës, Besnik Bislimi, e quajti të hënën nënshkrimin e kontratës mes Elektroseverit dhe kompanisë kosovare për Shpërndarjen e Energjisë Elektrike (KEDS), një hap tjetër drejt normalizimit të furnizimit me rrymë dhe lëshimit të faturave për qytetarët në katër komunat me shumicë serbe në veriun e Kosovës.

Të shtunën, i dërguari i posaçëm i Bashkimit Evropian për dialogun Kosovë-Serbi, Mirosllav Lajçak, njoftoi për nënshkrimin e kontratës mes kompanisë serbe dhe KEDS-it.

“Operimi edhe në veri, do të ndodhë brenda kornizës ligjore e rregullative të Republikës së Kosovës, ashtu siç në të gjithë territorin e vendit tonë”, shkroi Bislimi të hënën në rrjetin social Facebook.

Më 21 qershor, Kosova dhe Serbia e nënshkruan udhërrëfyesin për zbatimin e Marrëveshjes për Energji, që ishte arritur më 2013 në kuadër të dialogut të ndërmjetësuar nga BE-ja.

Elektrosever është pronë e kompanisë energjetike të Serbisë EPS (Elektroprivreda Srbije). Ajo e mori licencën për operim nga Zyra e Rregullatorit për Energji e Kosovës (ZRRE) më 24 qershor.

“Më shumë se 1 vit pas dakordimit mbi udhërrëfyesin e pasi që pala jonë i përmbushi menjëherë obligimet e saj që derivojnë nga marrëveshja, Elektrosever pranoi ta nënshkruajë kontratën”, tha Bislimi.

Ky udhërrëfyes nuk është zbatuar deri tani dhe Bislimi tha se tani është koha “të ecet tutje edhe me hapat e tjerë të nevojshëm për t'i dhënë fund pas më shumë se 20 vjetëve ilegalitetit në mospagesë të rrymës.”

Qytetarët e katër komunave në veriun e Kosovës nuk kanë paguar për rrymën e shpenzuar prej vitit 1999. Përgjatë viteve, borxhi i tyre është paguar nga qytetarët e komunave të tjera të Kosovës dhe që nga viti 2017 nga Qeveria e Kosovës.