Роналдо дар бозии Ювентус як голи дигар зад
Кристиано Роналдо футболбози маъруфи ҷаҳон, ки дар Амрико ба таҷовузи ҷинсӣ муттаҳам мешавад, баъди бозгашт ба дастаи Ювентуси Италия дар бозӣ бо дастаи Удинес як гол зад. Мусобиқоти ду тими кишвар бо ҳисоби 2 бар сифр ба нафъи Ювентус анҷом ёфт.
Бозӣ рӯзи 6-уми октябр баргузор шуд. Кристиано Роналдо, ки бо қарордоди 115 миллион долларӣ аз Реал Мадриди Испания ба Ювентус омад, то кунун 4 гол задааст.
Катрин Майорга, як духтари амрикоӣ ҳафтаи гузашта дар аёлати Невадаи Амрико расман аз Кристиано Роналдо шикоят бурд ва гуфт, ки ситораи 33-солаи футбол соли 2009 ӯро дар меҳмонхонае дар шаҳри Лас Вегас таҷовузи ҷинсӣ кардааст. Роналдо ин иддаоро рад мекунад.