"Сарбозшикор"-ҳои шабона дар Кӯлоб. "Облава" давом дорад?
Дар ҳоле ки то анҷоми даъвати тирамоҳии ҷавонон ба артиши Тоҷикистон камтар аз даҳ рӯзи дигар мондааст ва мақомот мегӯянд, беш аз 90 дарсади нақшаро иҷро карданд, сокинон аз "сарбозшикор" ё "облава" дар шабонгоҳҳо шикоят доранд. Мақомот ҳамвора вуҷуди "сарбозшикор"-ро рад мекунанд. Дар як моҳи ахир аз тарафи сокинони Фархору Ҳамадонӣ, Муъминобод, Восеъ ва Кӯлоби вилояти Хатлон ва минтақаҳои дигари Тоҷикистон ба Радиои Озодӣ даҳҳо шикоят расидааст. Сокинон мегӯянд, мақомот маҷбуран вориди хонаҳои онҳо шуда, "фарзандонашонро ба хидмати сарбозӣ мегиранд" ва "парво надоранд, ки онҳо беморанд, маъюб ё сиҳат."