Намояндаи КДАМ: Баъзе тафсилоти ҳамла ба дидбонгоҳи "Ишқобод"
Як намояндаи Кумитаи давлатии амнияти миллии Тоҷикистон (КДАМ) дар нишасте бахшида ба вазъи занон рӯзи 26-уми ноябр дар Душанбе баъзе ҷузъиёти ҳамла ба дидбонгоҳи "Ишқобод" дар марзи Тоҷикистону Узбекистонро ошкор кард. Қаблан танҳо як изҳороти КДАМ дар ин бора нашр шуда, мақомоти ин ниҳод аз шарҳи бештари воқеа худдорӣ мекарданд.
Муҳаммад Саидов, намояндаи Кумитаи давлатии амнияти миллӣ, ҳангоми суханронӣ дар мавзӯи "Тақвияти фаъолияти идеологӣ дар самти мубориза бо зуҳуроти экстремистӣ ва террористӣ" гуфт, дар ҳодисаи 6-уми ноябр "9 мард, 11 зан ва 13 ноболиғ иштирок кардаанд". Вале нагуфт, ки ноболиғон дар ин ҳамла чӣ масъулият доштаанд. Ин иттилоъ бо изҳороти аввали мақомот, ки гуфтанд, ҳамлаварон бист нафар буданд, тафовут дорад.
Радиои Озодӣ иттилое ба даст овардааст, ки яке аз ҳамлаварон 15-сола буда, дар синфи ҳашт мехонд ва аз мудири мактаб бо баҳонаи дидорбинии наздиконаш дар минтақаи дигари Тоҷикистон рухсат гирифтааст. Ин наврас ҳаргиз дар хориҷа набудааст.
Дар ҳамлаи 6-уми ноябр ба дидбонгоҳи "Ишқобод" дар ҳудуди ноҳияи Рӯдакӣ 15 ҳамлавар ва чанд тан аз нерӯҳои марзбонӣ ва милиса кушта, панҷ ҳамлавар дастгир шудаанд. Мақомот гуфтанд, ҳамла кори ҷангҷӯёни гуруҳи ваҳшатафкани "Давлати исломӣ" аст ва ба иттилои расмӣ "онҳо аз ноҳияи Қалъаи Золи Афғонистон омадаанд".
ДОИШ низ масъулияти ҳамларо ба дӯш гирифт, вале ҳамчунон фарзия ва гумонзаниҳои дигаре дар ҷомеа ва расонаҳо вуҷуд дорад. Мақомоти Афғонистон ва чандин манбаи боварбахш дар мақомоти Тоҷикистон убури ҳаросафканонро аз марз рад кардаанд.
Намояндаи Кумитаи давлатии амнияти миллии Тоҷикистон дар нишасти рӯзи сешанбе гуфт, "ин афрод фаъолияти худро дар Суғд ба роҳ монда, як моҳ дар хонае дар ҳудуди ноҳияи Исмоили Сомонӣ зистаанд. Раиси маҳалла онҳоро дид, нозири минтақавӣ дид, вале бетаваҷҷуҳӣ кардаанд", -- афзуд ӯ.
Муҳаммад Саидов гуфт, "дар ҳодисае, ки сурат гирифт, ҳарчанд хунукназарии мақомоти амният бошад ҳам, аз тарафи дигар сохторҳои маҳалла ва деҳаву оила бетаваҷҷуҳӣ зоҳир кардаанд."
Вай афзуд, бисёриҳо сабаби ифротишавии сокинонро камбизоатӣ унвон мекунанд, "вале ҳодиса нишон дод, ки оилаҳо шароити хуби зиндагӣ доранд." Ба қавли намояндаи Кумитаи давлатии амнияти миллӣ, тафтиши гуруҳ нишон додааст, ки дороии роҳбари гуруҳи ҳамлаварон Ғафуров Шуҳрат Аъзамович беш аз 1 миллион сомонӣ будааст. Тасдиқи дурустии ин хабар аз манобеи дигар ҳоли ҳозир ғайриимкон аст.
Бо гузашти бист рӯз аз ҳодиса мақомот тафсилоти ҳодисаро дар ихтиёри хабарнигорону ҷомеа нагузоштаанд. Хабарҳо дар бораи ҳодиса аз манобеи гуногун пароканда ба даст меояд ва фарзияҳое матраҳ мешаванд, ки хабари расмиро зери суол мегузоранд.
Шоҳиди ҳодисае шудед, манзараи ҷолиберо дидед ва ё хабари муҳим шунидед? Аз роҳи осон ва амн бо рақами Телеграми мо +420 724 053 959 фиристед. Ба канали Телеграми мо ҳамроҳ шавед.