Вазъи печида, вале зери назорат дар марзи Тоҷикистону Қирғизистон
Дафтари матбуоти Сарраёсати нерӯҳои марзбонии Тоҷикистон рӯзи 11-уми январ, сокинони деҳоти наздимарзии кишвари ҳамсояро ба ноорому печида шудани авзоъ муттаҳам кард. Аммо мақомоти Қирғизистон гуфтаанд, ки амалкардҳои ғайриқонунии шаҳрвандони Тоҷикистон, аз ҷумла сангандозии онҳо боиси ҷанҷолу хархаша ва тирандозӣ дар марз шудааст.
Дар баёнияи расмии Сарраёсати нерӯҳои марзбонӣ, ки хабаргузории давлатии “Ховар” нашр кард, омадааст, ки рӯзи 10-уми январ як сокини деҳаи Коктоши вилояти Ботканд, бо сангандозӣ тирезаи як нонвонхонаи деҳаи Сомониёни Исфараро шикастааст ва шаби 11-уми январ, гуруҳе аз сокинони деҳаи Коктош барои тарсонидани аҳолии Сомониён аз туфанги шикорӣ ба осмон 15 маротиба тир холӣ кардаанд. Дар баёния ҳамчунин омадааст, ки сокинон ва сарҳадбонони қирғиз мошини як сокини Тоҷикистонро Фарҳодҷон Аҷобиддинзодаро сангборон ва ӯро сахт захмӣ кардаанд.
Аммо дар Кумитаи марзбонии Қирғизистон ба бахши қирғизии Радиои Озодӣ гуфтаанд, ки сокинони Сомониён рӯзи 11-уми январ ҷамъ омада ва мошинҳои сокинони кишвари ҳамсояро сангборон кардаанд. Дар натиҷа байни сокинони ду тараф моҷаро бархоста ва ба сангандозӣ кашидааст. Аз ин пештар, вазирони умури хориҷии Тоҷикистону Қирғизистон Сироҷиддин Муҳриддин ва Чингиз Айдарбеков доир ба авзоъ дар марз суҳбат кардаанд ва ба гузориши бахши қирғизии Радиои Озодӣ, Айдарбеков зимни суҳбат аз сангандозии шаҳрвандони Тоҷикистон ба мошинҳои қирғизистониҳо ва истифода аз аслиҳа дар шаби 9 ва 10-уми январ изҳори нигаронӣ кардааст.
Бино ба гузориши бахши қирғизии Радиои Озодӣ, рӯзи 10-уми январ ҳамчунин дар вазорати умури хориҷии Қирғизистон ба консули Тоҷикистон дар Бишкек нотаи эътирозӣ додаанд, ки дар он аз “ҳаракатҳои иғвогарона ва харобкоронаи шаҳрвандони Тоҷикистон, ки ба нооромӣ дар марзи Қирғизистону Тоҷикистон мерасонад”, изҳори нигаронӣ шудааст.
Аммо дар баёнияи Сарраёсати нерӯҳои марзбонии Тоҷикистон баръакс аз амалкардҳои сокинони Қирғизистон изҳори нигаронӣ шудааст. Дар ин баёния омадааст: “Боиси нигаронӣ аст, ки вақтҳои охир шаҳрвандони алоҳидаи Қирғизистон, бо истифодаи яроқ ва ҳаракатҳои ғайриқонунӣ ба ҳаёт ва саломатии шаҳрвандони Ҷумҳурии Тоҷикистон хатари ҷиддӣ эҷод карда истодаанд.”
Тоҷикистону Қирғизистон 976 километр марз доранд, ки то кунун 504 километри он муайян ва аломатгузорӣ шудааст. Ду тараф бо вуҷуди гузашти солҳо натавонистанд, сари минтақаҳои баҳсбарангез ба мувофиқа бирасанд ва хати марзбро бикашанд. Ҷанҷолу тирандозӣ маҳз дар ҳамин минтақаҳо ва барои обу замин ва чарогоҳ сурат мегирад.
Гузориш ба зудӣ такмил мешавад. Бозгашт ба саҳифаи Радиои Озодиро фаромӯш накунед. Агар дар ҷои ҳодиса будед, ё аксе видеое доред, лутфан, ба ин шумораҳо ва ба воситаи Вотсап, Вайбер, Телеграм ва ё ИМО бифристед: (+420) 607 900 808; (+420) 724 056 681; (+420) 724 053 959; (+992) 980 15 10 10