"Тавҳидбонк" ба кормандони зан иҷозат дод рӯймол ба сар кунанд
Мақомоти Тоҷикистон дар як тасмими камсобиқа ба "Тавҳидбонк" - ягона бонки исломӣ дар кишвар иҷоза додаанд, кормандони зане, ки ба муштариёни ин бонк хидмат мерасонанд, рӯймол ба сар кунанд. Дар бонкҳои дигар барои занон либосҳои ягона дуруст кардаанд, ки рӯймолро дар бар намегирад.
Масъалаи рӯсарии занон дар Тоҷикистон чанд сол боз доғ аст. Мақомот бо рӯсарӣ ҳузур ёфтани бонувонро дар идораҳои давлатӣ манъ кардаанд. Ҳомиёни ҳуқуқи башар ва созмонҳои байналмилалии дифоъ аз ҳуқуқи инсон ин сиёсати давлати Тоҷикистонро нақзи ҳуқуқи шаҳрвандон номидаанд.
Яке аз масъулини дафтари матбуоти "Тавҳидбонк" рӯзи 30-уми январ дар сӯҳбат ба Радиои Озодӣ гуфт, бастани рӯймол ба кормандони зане, ки дар "бахши иртибот бо муштариён кор мекунанд, ҳатмӣ аст. Чунки ин гуна либос як нишонаи бонки мо ба ҳисоб меравад".
Масъулони "Тавҳидбонк" мегӯянд, либоси ягонаи кормандони бонк таҳия ва тасдиқ шудааст ва мақомоти танзимгар низ бо тарҳи либоси бонувоне, ки дар ин бонк кор мекунанд мувофиқанд. "Тавҳидбонк" барои кормандонаш либоси ягонаи осмонрангро интихоб кардааст ва ҳамагуна шиору овезаҳои бонк низ бо ин ранг таҳия шудаанд.
Пӯшиши рӯсарӣ дар идораҳои давлатӣ, хусусӣ ва бонкҳо дар Тоҷикистон тибқи ягон қарор, фармон ва ё санаде манъ нашудааст. Аммо бонкҳои Тоҷикистон ҳар кадоме тарҳи либоси хоси худро доранд ва дар низомномаҳои дохилии бонкҳо ба занони корманд ҳамин либосҳо тавсия мешавад. Дар бастаи либосҳои "тавсиявӣ", ки риояи он барои ҳама кормандон маъмулан ҳатмист, рӯймол нест.
Қаблан Эмомалӣ Раҳмон, президенти Тоҷикистон аз мудирони бонкҳои кишвар хост бонувонро барои кор дар бонкҳо бипазиранд. Раисҷумҳур гуфт, занон нисбат ба мардон дар ҳифзи пулҳои бонк содиқтаранд чун, ба гуфтаи президент, кормандони мард ба маош қаноат накарда, пулҳои бонкро аз они худ мекунанд.
"Мардони тануманде, ки дар кабулгоҳҳои бонкҳо менишинанд ва ҳам онҳое, ки бо мизоҷон муносибати дағалона карда, онҳоро аз бонкҳо мегурезонанд, бояд дар НОБ "Роғун" рафта кор кунанд ва ба ҷои онҳо бояд бонувони ҷавон ҷалб шаванд",-таъкид кард президент.
Зимнан, "Тавҳидбонк", ки рӯзи 29-уми январ як бахши нави худро дар ноҳияи Фирдавсии шаҳри Душанбе ифтитоҳ кард, гузориш медиҳад, ки 80 дарсади кормандонаш дар ин шӯъба занон ҳастанд.
"Тавҳидбонк" нухустин бонки исломӣ дар Тоҷикистон аст, ки 16-уми сентябри солои 2019 иҷозаи фаъолиятро ба даст овард, вале хидматрасониҳояш расман аз моҳи ноябр оғоз шуд. Ин бонк дар заминаи "Соҳибкорбонк" ташкил шудааст, ки сармояаш ба 65 миллион сомонӣ, муодили 6,5 миллион доллар баробар аст.
Фаъолияти аввалин бонки исломӣ дар ҳоле сурат мегирад, ки дар чаҳор соли ахир чор бонки азими Тоҷикистон, "Агроинвестбонк", "Тоҷиксодиротбонк", "Фононбонк" ва "Тоҷпромбонк" дучори бӯҳрон шуда, дар пардохти амонати муштариён оҷиз монданд.
Бо қарори Бонки миллӣ "Тоҷпромбонк" ва "Фононбонк" варшикаста эълом шуданд ва ҳанӯз бисёре аз муштариён аз бонкҳо пасандози худро гирифта натавонистанд. Бовари муштариён ба низоми бонкӣ кам шуд ва ҳамакнун масъулони "Тавҳидбонк" бо такя ба боварҳои динии мардум умед доранд, ки муштарӣ пайдо мекунанд.