Замир Кобулов: Тоҷикистон мухолифи бархе нуқоти "Эъломияи Қазон" аст
Расонаҳои русӣ аз қавли Замир Кобулов, намояндаи вижаи Русия дар умури Афғонистон навиштанд, ки Тоҷикистон бархе аз нуқтаҳои эъломияи нишасти "Формати Маскав"-ро таъйид накардааст. Нишасти "Формати Маскав" дар бораи Афғонистон, имрӯз, 29-уми сентябр дар шаҳри Қазон оғоз шуд.
Ба иттилои хабаргузории русии ТАСС, Замир Кобулов ба хабарнигорон дар бораи натиҷаҳои шашумин нишасти "Формати Маскав" гуфт, "кори мо такмил шудааст, Эъломияи Қазон тақрибан тавассути ҳама, ба ҷуз Тоҷикистон, таъйид шудааст. Шарикони тоҷики мо ба бархе аз нуқтаҳои ин эъломия эътироз доранд".
Аммо Замир Кобулов дақиқан нагуфтааст, ки Тоҷикистон ба кадом нуқтаҳои ин эъломия мухолифат кардааст. Ҷониби Тоҷикистон ҳам то кунун дар ин робита ибрози назар накардааст.
Аммо ба иттилои расонаҳои русӣ, Шараф Раҳимӣ, намояндаи Тоҷикистон дар ин ҳамоиш гуфтааст, ки дар Афғонистон ҳуқуқи дигар қавмҳо нодида гирифта шуда, манобеи иқтисодӣ ва сиёсӣ ба таври нобаробар дар кишвар байни ақвом тавзеъ шудааст. Вай гуфтааст, ки Тоҷикистон аз ташкили як ҳукумати фарогир ҳимоят мекунад, ки дар он ҳама гурӯҳҳои қавмӣ ҳузур дошта бошанд.
Шараф Раҳимӣ дар ин ҳамоиш ҳамчунин гуфтааст, ки гурӯҳҳои террористӣ дар Афғонистон афзоиш ёфтаанд ва ҷавонони ин кишвар талош доранд ба гурӯҳҳои террористӣ бипайванданд. Вай афзудааст, ки ин гурӯҳҳо аслиҳаи сабук ва вазнин дар ихтиёр доранд ва маълум шудааст, ки аз фурӯши маводи мухаддир даромад доранд.
Намояндаи Тоҷикистон дар ин нишаст ба фақри шадид ва вазъияти бӯҳронӣ дар Афғонистон ишора кардааст. Ӯ гуфтааст, ки расидагӣ ба мушкилоти ҷиддии ҳуқуқи башар ва вазъияти бади иқтисодӣ ва ташкили ҳукумати фарогир дар ин кишвар, хости ҳама кишварҳои ҳамсоя аст.
Тоҷикистон бо Афғонистон ҳудуди 1400 километр марзи муштарак дорад ва Шараф Раҳимӣ гуфтааст, ки ҳама кишварҳои кӯмакрасон метавонанд аз марзҳои Тоҷикистон истифода кунанд.
Ахиран Тоҷикистон ҳама пулҳои марзӣ бо Афғонистонро дар Вилояти Мухтори Кӯҳистони Бадахшон дигарбора боз кард.
Пас аз ба сари қудрат омадани Толибон, мақомоти Тоҷикистон дар мавориди зиёде нигаронии худро аз ҳузури ҷанҷӯёни тоҷик дар хоки Афғонистон иброз доштаанд. Дар авоили моҳи ҷорӣ дар ҳудуди ноҳияи Дарвоз се тан аз ҷангиёни гурӯҳи "Ансоруллоҳ" кушта шуданд. Мақомоти тоҷик эълон карданд, ки онҳо бо силоҳу таҷҳизоти зиёд аз қаламрави Афғонистон вориди Тоҷикистон шуданд.