Мәктәпләр, вузлар 2021 елның сентябрь аена кадәр тәрбия программаларын кертергә тиеш
(Казан, 18 ноябрь, «Татар-информ», Гөлнар Гарифуллина). Мәктәпләр, көллиятләр һәм вузлар киләсе елның сентябрь аена кадәр үз белем бирү программаларына тәрбия программаларын кертергә тиешләр. Бу хакта Дәүләт Советында Мәгариф, мәдәният, фән һәм милли мәсьәләләр комитеты утырышында республиканың мәгариф һәм фән министры урынбасары Алсу Әсәдуллина әйтте.
Ул июльдә укучыларның тәрбия мәсьәләләренә кагылышлы федераль закон кабул ителгәнен искәртте. Балалар һәм яшьләрнең белемендә тәрбия компоненты ролен көчәйтүгә юнәлдерелгән яңа закон 2020 елның 1 сентябреннән үз көченә кергән.
«2021 елның 1 сентябренә кадәр мәктәпләр, көллиятләр һәм вузлар белем бирү программаларына тәрбия программаларын һәм тәрбия эше буенча календарь планын кертә ала», — диде Алсу Әсәдуллина.
Закон буенча, мәктәпләр, тәрбия программалары җыелмасыннан иң яхшысын сайлап алып, ата-аналар комитеты һәм укучылар советы фикерләрен исәпкә алып, эш оештыра ала. Законны гамәлгә ашыруның төп нигезе — федераль тәрбия программасы. Ул укучыларга Ватанга, гаиләгә мәхәббәт, дуслык кадере кебек кыйммәтләрне сеңдерергә тиеш булачак.
Алсу Әсәдуллина сүзләренчә, узган уку елыннан республиканың 24 мәктәбе тәрбия программасын сыный. Аны Россия мәгариф академиясенең Мәгарифне үстерү стратегиясе институты эшләгән.
«Федераль экспертиза Мөслим районы Күбәк уртак мәктәбенең тәрбия программасын югары бәяләде. Якынча программаны сынап карау бу уку елында да дәвам итәчәк. Якынча тәрбия программасы Гомуми белем буенча федераль уку-методик берләшмәсе утырышында хупланган һәм якынча төп гомуми белем программалары реестрына кертелгән», — диде министр урынбасары.