Фәрит Мөхәммәтшин 8 июльдә парламент утырышында ТР Дәүләт Советы эшенә йомгак ясаячак
(Казан, 2 июль, «Татар-информ», Надежда Гордеева). VI чакырылыш Татарстан Дәүләт Советының 23 утырышы 8 июльдә булачак. Анда парламент башлыгы Фәрит Мөхәммәтшин республика Дәүләт Советының 2021 елның беренче яртыеллыгындагы эшенә йомгак ясаячак.
Татарстан парламенты президиумы утырышында Дәүләт Советы секретаре Лилия Маврина сөйләгәнчә, депутатлар 17 мәсьәләне, шул исәптән биш республика закон проектын да караячак.
Депутатлар беренче укылышта «Татарстанда урманнардан файдалану турында» һәм «Татарстанда Коррупциягә каршы тору турында» законнарга, шулай ук ТР Җир һәм Экология кодексына үзгәрешләр кертә торган закон проектлары турында фикер алышачак.
Парламентарийлар Татарстанның Хисап палатасының узган елгы эшчәнлеге турында исәп-хисап, Идел буе федераль округы буенча Россия Гидрометеорология департаментының республикадагы эшчәнлеге турында мәгълүмат, Татарстан Гидрометеорология һәм әйләнә-тирә мохитне күзәтү идарәсенең тирә-якның пычрануы һәм нинди хәлдә булуы турында доклад тыңлаячак.
Моннан тыш депутатлар җиде федераль закон проекты турында да фикер алышачак.