Татарстанда 21 ресторанга төнлә эшләргә рөхсәт иттеләр
(Казан, 2 июль, «Татар-информ», Эвелина Киселева). Татарстанда 21 җәмәгать туклануы бинасы төнлә эшли башлады. Аларда барлык хезмәткәрләр дә коронавирус инфекциясенә каршы прививка ясаткан.
Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе җитәкчесе урынбасары Любовь Авдонина «Татар-информ» агентлыгында узган матбугат конференциясендә шулай дип белдерде.
«37 җәмәгать туклануы объектыннан белдерү хаты килде. Алар — вакыт ягыннан чикләмичә төнлә эшләргә теләк белдергән оешмалар. Шулардан 21 объект буенча уңай карар кабул ителде, 16сы кире кагылды», — дип искәртте спикер.
Казанда 13 ресторан һәм кафега эшләргә рөхсәт ителде. Моннан тыш, Яшел Үзәндә биш җәмәгать туклануы объектына төн уртасыннан соң эшләргә ярый. Шулай ук Биектау, Азнакай һәм Зәйдә берәр оешма эшләргә рөхсәт алды.
«Татар-информ» агентлыгы элегрәк хәбәр иткәнчә, ТР Хөкүмәте карарына кайбер үзгәрешләр кертелгәннән соң кафе һәм рестораннар төнлә эшләү өчен рөхсәт алырга мөмкин. Әмма рөхсәт барлык хезмәткәрләр прививка ясаткан очракта гына бирелә. Прививка куярга ярамаган кешеләргә искәрмә ясала.
Кафе һәм рестораннар вакцинация сертификатлары һәм белешмәләр тәкъдим итәргә тиеш. ТР буенча Роспотребнадзор идарәсе, документларны тикшереп, өч эш көне эчендә тиешле карар чыгарачак.