(Казан, 2 июль, «Татар-информ», Рифат Каюмов). Казанның 102нче гимназия укучысы Камилла Гатина 3 фәннән БДИны 296 баллга тапшырган. Камилла Гатинаның рус теле һәм химиядән бердәм дәүләт имтиханын йөзәр баллга тапшыруы хакында «Интертат» язган иде. Бүген биологиядән БДИ нәтиҗәләре билгеле булды. Камилла Гатина «Татар-информ» журналистына бу фәнне 96 баллга тапшыруы хакында әйтте. Шулай итеп, Камилла 3 фәннән 296 балл җыйган. Камилла Мәскәү дәүләт Медико-стоматология университетына укырга кереп, стоматолог булырга җыена. Ул имтиханнарга әзерләнү өчен репетитор ялламаган, үзлегеннән шөгыльләнгән. Камилланың әти-әнисе чыгышлары белән Балтач районыннан. Камилла Гатина белән интервьюны «Интертат» сайтыннан укырга мөмкин.
