Роспотребнадзор идарәсе: Татарстанда коронавируска бәйле хәл тотрыклы түгел

(Казан, 3 июль, «Татар-информ», Надежда Захарова). 2021 елның июнендә Татарстанда коронавирус инфекциясен йоктыручылар саны май ае белән чагыштырганда 7 процентка кимегән. Әмма вазгыятьнең тотрыклы төс алуы хакында сөйләргә әле иртәрәк, чөнки 25 майдан соң яңа очраклар саны 14 процентка артты.

Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе башлыгы урынбасары Любовь Авдонина видеоконференция элемтәсе режимындагы киңәшмәдә шулай дип белдерде.

Яңа очракларның артуында төп сәбәп — вакцинация темпларының җитәрлек дәрәҗәдә булмавы, шулай ук татарстанлыларның коронавирус инфекциясенә каршы чараларны үтәмәве. «Безнең арада прививка ясатмаган кешеләр әле шактый, алар вирусның потенциаль корбаннары булып тора, инфекция йоктыручылар санының алга таба арту ихтималы бар», — дип белдерде белгеч.

Авдонина билгеләп үткәнчә, инфекция йоктыручыларның күпчелеге — пенсионерлар һәм эшсезләр. Республикада өлкән яшьтәге кешеләрне вакцинацияләүнең уртача дәрәҗәсе 20 процент тәшкил итә, шул ук вакытта Әлмәт һәм Кукмара районнарында күрсәткечләр бик түбән, аларда әлеге яшь категориясенә караган затларның 8 проценты гына прививка ясаткан.

Тулаем алганда, Татарстанда өлкән яшьтәге кешеләрнең 20 проценты вакцинация узган. «Безнең бурыч — күмәк иммунитетка ирешү, моның өчен барлык шартлар һәм мөмкинлекләр дә бар», — дип белдерде Любовь Авдонина.

Татарстанның барлык районнары белән видеоконференция элемтәсе режимындагы киңәшмәне ТР Президенты Рөстәм Миңнеханов үткәрде. Чарада ТР Премьер-министры Алексей Песошин да катнашты.